January 9th, 2007
pilitan sa gupitan
sabi nila dapat sa bagong taon, may bagong umpisa... dapat magbago at kung anu-ano pa na maaring iugnay sa salitang bago...
ako, hindi ako panatiko ng sa mga bagay na may kaugnayan sa salitang bago o pagbabago... maliban na lang kung ang pag-uusapan natin eh pelikula, kanta, smallville, grey's anatomy, house at libro ni grisham at ni bob ong... isama na din ang bagong maxim at fhm... maliban sa mga bagay na iyan, hanggat maari eh wala na akong gustong mabago...
ilang ulit ko nang binalak magbago... hanggang umpisa lang... tulad ng pag-uumpisa ko ng purpose driven life, 40 days, naku ang pinakamatagal, day 12... sabi ko, wag ipilit kasi kaya baka di umuubra...
kaya heto na uli ako, umpisahan ang bagong taon sa bagong gupit... bitbit ang sarili pilit kong pumunta sa manggupit ng buhok... di ako pumunta sa barbero eh... kasi lagi nasusugatan tenga ko dahil sa labaha.. hmmp... gunggong ng barbero di nag-iingat....
eh di ganun nga... nakaupo na ako sa trono ng gugupitan... sa salamin, nakita ko ang manggugupit na gupitin ang aking buhok na pinapahaba ng mahigit kumulang na 3 buwan... at hayun... malipas ang ilang tsktsk... tsktsk ng kanyang gunting... may dumapo na sa aking tiyan na buhok... napatingin ako... pinakatitigan...
sa aking isipan sumagi sa isip ko na tinanggal ang dating bahagi ng aking katawan ng hindi ko naramdaman ang sakit... walang dulo... wala lang... naisip ko bigla...
eh kung gupitin ko na kaya ng tuluyan ang aking nararamdam para sa taong minahal ko patuloy na minamahal... panahon na siguro na bigyan ng bagong hairdo ang aking puso... tutal dati eh di gel pa ito tapos biglang kinalbo tapos pinatubo ko kahit na yung taong gumupit sa akin eh wala na sa aking piling... nagbabakasakali kasi ako na babalik siya para gupitan uli ako at malagyan ng gel... pero hindi siya dumating... naghanap ng bagong gugupitan...
ako naman habang pinapahaba ang buhok na kinalbo sa aking puso, eh nagpatrim ke ganito at ganuon... sana sa mga dilag na minahal ko, hindi kayo magtampo at mag-isip na ginawa ko kayong pampalipas oras habang hindi nagbabalik ang taong kumalbo sa aking puso...
bigo ako sa aking pag-aantay... di na siya bumalik... pero ayaw ko nang ipaputol ang aking buhok na naghahabulan na sa magkakaibang haba... kaya siguro sa mga nagtrim ng buhok ko at pilit ibig gumupit nito at bigyan ng bihis eh pinabayaan ko kasi mahal ko ang taong dahilan ng aking pagpapahaba ng buhok...
pero noong nakausap ko ang kaibigan ko at sinabi sa akin na: "ritch, alam mo kung ano ang nangyari sa akin... pilit kong ipinaglaban yung sa amin pero nakakapagod din mag-isip ng kung tama ba na ipaglaban o hindi... ritch, sa mga nasabi mo, alam mo na ang gagawin pero dinedeny mo lang.... "
tsktsk... tsktsk... tsktsk... nakita kong naglaglagan pa ang iba pang buhok... balik ako sa pag-iisip.... siguro marapat na rin na gupitin ko ang kontrata na kapag umabot ako ng 28 at wala pa kaming asawa eh papakasalan namin ang isat isa... tama na... ayaw ko na ng mahabang buhok na naghahabulan.... ayaw kong umasa na darating pa siyang muli upang isaayos ang buhok ng puso ko... kinalbo na niya... pinahaba ko... pero ang hindi ko alam... ako na pala mismo ang dahilan kung bakit hindi umuubra ang ginawang panggugupit ng ibang manggugupit ng buhok ng puso ko...
sa ngayon.... ako na mismo ang kumalbo nito... sinabi ko sa puso ko, panahon na para kalbuhin ka uli para ang buhok ng puso ay tumubo nang muli at hahanap na ako ng bagong manggugupit ng buhok ng puso ko... handa na ako na ipasakamay ang puso ko at ang buhok nito, ang gunting at suklay sa taong alam kong aalagan ito upang sa pag-tubo ng buhok nito ay maging malago at nang malagyan na ng stronghold na gel... para pangmatagalan na ang pwesto ng buhok ko at syempre para maging suki na kami ng aking bagong manggugupit...
krssh.. krsshhh sabi ng velcro ng telang nakapulupot sa aking leeg... "sir, shampoo na po natin ang buhok niyo... tapos na po... "
yung buhok ko sa ulo... tapos na... solb... ngayon, dahil pista ng poong nazareno ng quiapo, doon ako magtutungo... doon ako hihiling na sana makahanap na ako ng dilag na gugupit sa buhok ng puso ko...
sana... hindi niya itarak ang gunting sa buo kong puso sapagkat ngayon, magpapaubaya na ako... hindi lang buhok ng puso kundi pati kabuuan nito...
nga pala, paglabas ko ng simbahan ng quiapo mamya, daan nga ako ng 7-11... makabili nga ng spout na red para share kami ng pamangkin ko...
